جۇما كۇنى اقپارات جانە كوممۋنيكاتسيالار مينيسترلىگىنىڭ ۇيىتقى بولۋىمەن قازاقستان رەسپۋبليكاسى كونستيتۋتسيالىق كەڭەسىنىڭ مۇشەسى ۋنزيلا شاپاق ەل كونستيتۋتسياسىن ءتۇسىندىرۋ مەن ىسكە اسىرۋ ماسەلەلەرى بويىنشا كەزدەسۋ-سەمينار وتكىزدى.
اتالعان مينيسترلىكتىڭ جانە ونىڭ قۇرىلىمدىق بولىمشەلەرىنىڭ, ۆەدومستۆولىق باعىنىستاعى ۇيىمدارىنىڭ, سونداي-اق, باق وكىلدەرىنىڭ قىزمەتكەرلەرى قاتىسقان سەميناردا كونستيتۋتسيالىق كەڭەستىڭ مۇشەسى ۋنزيلا شاپاق الدىمەن قازاقستان تاريحىنداعى كەزىندە قابىلدانعان كونستيتۋتسيالاردان حاباردار ەتتى. سونىمەن بىرگە, قازاقستان كونستيتۋتسياسى كۇنى قارساڭىندا ۇيىمداستىرىلعان بۇل ءىس-شارانىڭ ماقساتىنا توقتالدى. «بۇگىنگى سەميناردى وتكىزۋدەگى باستى ماقسات – ازاماتتاردىڭ قۇقىقتىق ساۋاتتىلىعىن ارتتىرۋ, – دەدى ول. – قۇقىقتىق ساۋاتتىلىقتىڭ نەگىزى – زاڭنىڭ نورمالارىن ءوزىنىڭ پايداسى مەن مىندەتىنە زاڭدى تۇردە قولدانۋ. بۇعان كونستيتۋتسيا تولىق مۇمكىندىك بەرەدى. ال قازىرگى كەزدە اتا زاڭىمىزدىڭ الەۋە- ءتى وتە زور».
كونستيتۋتسيالىق كەڭەس مۇشەسى مەملەكەتتىك ورگاندارعا بەلگىلى ءبىر ماسەلەگە بايلانىستى سۇراۋ-حات جولداعاندا, وعان جاۋاپتى قالاي تەز الۋعا بولاتىنىنا دا تۇسىنىك بەردى. ونىڭ ايتۋىنشا, قانداي دا ءبىر مەكەمەگە حات جازعان كەزدە, سول ماسەلەگە قاتىستى اتا زاڭنىڭ باپتارىندا كورسەتىلگەن زاڭدىق نورمالاردى, سوعان بايلانىستى زاڭ تارماقتارىن, كونستيتۋتسيالىق كەڭەستىڭ ءتيىستى قاۋلىلارىن باسشىلىققا العان ءجون.
ءاليسۇلتان قۇلانباي, «ەگەمەن قازاقستان»